عن التغير, وما إلى ذلك

هل من الأفضل أن نتطور وننضج أم لا؟؟ اعتقد إن الإجابه الطبيعية و المباشرة هي طبعآ, لازم الإنسان ينضج و يكبر ويعرف إزاي يتعامل مع الناس.. لكن لما برجع أفكر في الموضوع ألاقي إنه مش شرط. أنا عن نفسي كنت زمان بتصرف في حاجات كتير بطريقة "مختلفة", لما ببص علي نفسي اليومين دول بلاقي اني بقيت بتصرف بطريقة اكثر طبيعية لمجاراة الناس, علشان يبقي شكلي مقبول اكثر.. أنا عارف إن الموضوع ده معقد قوي, ومهم لكل الناس, بس مش ده اللي انا عايز اتكلم فيه. انا عايز اتكلم عن موضوع فرعي منه وهو التعامل و طريقة التصرف مع الناس.. مش تطور شخصية الانسان عمومآ. هل المفروض اننا ننضج في تعاملنا مع الاخرين, مما يعني التنازل عن جزء كبير من الصفات الشخصيه المميزه لنا كأفراد, فى مقابل تقبل الأخرين, ولا التمسك بالصفات دي(اللي جزء كبير منها غلط بالنسبه لمعظم الناس, بس أنا مؤمن انها صح) في مقابل الحفاظ علي شخصياتنا الفريده. هل هدفنا إننا نقرب المسافات بيننا علشان نتفاهم مع بعض اكتر, ولا ان احنا نخلي المسافات دي زي ماهيه في مقابل ان احنا نطور من نفسنا عن طريق تمسكنا بافكارنا و سماتنا المميزه, و في نفس الوقت تقبل اختلافات الاخرين. اللي فكرني بالموضوع ده اني بقيت دلوقت لما باتكلم مع حد نص أعرفه.. نعرف بعض بص مش أصحاب قوي يعني.. او حد في اطار العائلة مثلآ, لقيت إني بقيت بقدر اتكلم معاهم (شويه) بطبيعيه.. باستحمل كلامهم اللي انا عارف انه كتير بيبقى يأما غلط او غبي, و بأتناقش في المواضيع الغبية و القصص الممله اللي بيتكلموا فيها,و أسمع ذات نفس القصص اللي سمعتها قبل كده و أعمل أني بسمعها أول مره بدل ما أرد عليهم برخامه إني سمعتها قبل كده.. و كتير بأكبر دماغي اني ادخل في مناقشات عارف انها هتطول علشان اقنعهم بوجهة نظري اللي انا متأكد انها صح. الناس بدأت تلاحظ ده وبتقول اني كبرت.. وبقي شكلي انسان طبيعي اكتر من زمان. هل دي حاجة كويسة؟ هل ده هدف.. انا فعلا من زمان زهقت من كتر مابيتقال عليا قد ايه انا مختلف وشاذ عن المجموع و دماغي بايظه, و كنت باحاول اني اغير من ده (بأني بس استحمل الناس اكتر شويه) و مكنتش بقدر, لكن دلوقتي بقيت باعرف.. فهل دي حاجه كويسه.. انى ابقي واحد تاني زي الناس (أو بس شكلي قدام الناس, بفرض اني مش هتغير من جوايا)..حاسس اني بخون نفسي, انا القديم اللي ياما صبر معايا واستحمل كلام الناس, اول مجتلي فرصة اتخليت عنه, وفي مقابل ايه.. مش كتير.. مش عارف,مضايقني قوي الموضوع ده و مش لاقيله حل, لما نرجع للكلام على التغيير على المستوي الشخصي ككل بافتكر جملة للدكتور أحمد خالد توفيق على لسان رفعت إسماعيل, مش فاكرها بالظبط لكن ده المعنى اللى فاكره منها: ان الناس دايمآ بتبقى مختلفه ومش متقبله المجتمع و هيه صغيره, لكن لما بتكبر بتتعلم التعامل مع الواقع بغبائه و مشاكله, و اللى مبيقدرش يتغير بيتحول لفنان, او ثوري... او مجنون