عن التغير, وما إلى ذلك
هل من الأفضل أن نتطور وننضج أم لا؟؟
اعتقد إن الإجابه الطبيعية و المباشرة هي طبعآ, لازم الإنسان ينضج و يكبر ويعرف إزاي يتعامل مع الناس.. لكن لما برجع أفكر في الموضوع ألاقي إنه مش شرط. أنا عن نفسي كنت زمان بتصرف في حاجات كتير بطريقة "مختلفة", لما ببص علي نفسي اليومين دول بلاقي اني بقيت بتصرف بطريقة اكثر طبيعية لمجاراة الناس, علشان يبقي شكلي مقبول اكثر.. أنا عارف إن الموضوع ده معقد قوي, ومهم لكل الناس, بس مش ده اللي انا عايز اتكلم فيه. انا عايز اتكلم عن موضوع فرعي منه وهو التعامل و طريقة التصرف مع الناس.. مش تطور شخصية الانسان عمومآ. هل المفروض اننا ننضج في تعاملنا مع الاخرين, مما يعني التنازل عن جزء كبير من الصفات الشخصيه المميزه لنا كأفراد, فى مقابل تقبل الأخرين, ولا التمسك بالصفات دي(اللي جزء كبير منها غلط بالنسبه لمعظم الناس, بس أنا مؤمن انها صح) في مقابل الحفاظ علي شخصياتنا الفريده. هل هدفنا إننا نقرب المسافات بيننا علشان نتفاهم مع بعض اكتر, ولا ان احنا نخلي المسافات دي زي ماهيه في مقابل ان احنا نطور من نفسنا عن طريق تمسكنا بافكارنا و سماتنا المميزه, و في نفس الوقت تقبل اختلافات الاخرين. اللي فكرني بالموضوع ده اني بقيت دلوقت لما باتكلم مع حد نص أعرفه.. نعرف بعض بص مش أصحاب قوي يعني.. او حد في اطار العائلة مثلآ, لقيت إني بقيت بقدر اتكلم معاهم (شويه) بطبيعيه.. باستحمل كلامهم اللي انا عارف انه كتير بيبقى يأما غلط او غبي, و بأتناقش في المواضيع الغبية و القصص الممله اللي بيتكلموا فيها,و أسمع ذات نفس القصص اللي سمعتها قبل كده و أعمل أني بسمعها أول مره بدل ما أرد عليهم برخامه إني سمعتها قبل كده.. و كتير بأكبر دماغي اني ادخل في مناقشات عارف انها هتطول علشان اقنعهم بوجهة نظري اللي انا متأكد انها صح. الناس بدأت تلاحظ ده وبتقول اني كبرت.. وبقي شكلي انسان طبيعي اكتر من زمان. هل دي حاجة كويسة؟ هل ده هدف.. انا فعلا من زمان زهقت من كتر مابيتقال عليا قد ايه انا مختلف وشاذ عن المجموع و دماغي بايظه, و كنت باحاول اني اغير من ده (بأني بس استحمل الناس اكتر شويه) و مكنتش بقدر, لكن دلوقتي بقيت باعرف.. فهل دي حاجه كويسه.. انى ابقي واحد تاني زي الناس (أو بس شكلي قدام الناس, بفرض اني مش هتغير من جوايا)..حاسس اني بخون نفسي, انا القديم اللي ياما صبر معايا واستحمل كلام الناس, اول مجتلي فرصة اتخليت عنه, وفي مقابل ايه.. مش كتير.. مش عارف,مضايقني قوي الموضوع ده و مش لاقيله حل, لما نرجع للكلام على التغيير على المستوي الشخصي ككل بافتكر جملة للدكتور أحمد خالد توفيق على لسان رفعت إسماعيل, مش فاكرها بالظبط لكن ده المعنى اللى فاكره منها: ان الناس دايمآ بتبقى مختلفه ومش متقبله المجتمع و هيه صغيره, لكن لما بتكبر بتتعلم التعامل مع الواقع بغبائه و مشاكله, و اللى مبيقدرش يتغير بيتحول لفنان, او ثوري... او مجنون
posted by amgadpasha @ 1/24/2006 04:41:00 PM
5 Comments:
أحب أولا أن أهنئك لأنك فى هذا البوست أبهرت كل قراءك (أنا يعنى) .
و ثانيا بالنسبة لموضوع التغيير أو التغير ده.... إنت فعلا اتغيرت و لازم كل واحد كان كده وهو صغير -طفل غير طبيعى ثم مراهق طبيعى - يتغير لما يكبر.
لأن الطفل أو المراهق لا يمل أو بالأحرى يتسلى ويحب أن يظهر اختلافاته ويستمتع بعدم المبالاة بآراء الآخرين لأنها 100فى ال 100 غلط...و لكن عندما تكبر يصبح الاختلاف و المجادلة روتين ممل ..ربما لأنهم عرفوا خلاص إنك مختلف أو هروبا من انتفاخ البيضة الشمال و ما يصاحبه من آلام مبرحة تقودك إلى الجنون ..و لكن يجب أن تظل أنت أنت كما أنت و بخاصة مع من عرفك كما أنت أنت.
فهناك تنازلات يجب أن نقدمها و هناك تنازلات يجب أن لا نقدمها حتى لا نفقد أشياءا لا يجب أن نفقدها ... مثل أنفسنا
ma3alesh ha3alak be 7eroof english 3alashan asra3 keteer ... besara7a ana ba3taber dah nodg aktar .. aw yemken zakaa2 egtema3y ..beyoktasab 3n taree2 el tagroba ...eah lazmet ennak tetna2esh ma3a 7d fe mawdoo3 enta 3aref enno mesh hayaktane3 beeh fel a7'er ?? mafeesh lazma ... we eah lazmet ennak ta3tared besoot 3aly eza kan dah mesh hay3'ayar 7aga .. ela eza kont 3ayez te3mel 7aga shabah "7'alef to3raf " .. bs fe nafs el wa2t .. 3alashan mat7esesh ennak bet7'oon nafsak ..matwafe2sh ..3alashan law geh el wa2t we kan ra2yak el 7a2ee2y ( elly ya rab sa3etha matkonsh neseeto asasan ) hay3'ayasr 7aga fe3lan ..te2dar te2olo mn 3'eer matkoon nakedt nafsak .....
العزيز المجهول, انا مختلف معاك.. انت مخدتش بالك من النقطه اللى بتكلم فيها, التغير اللي انت بتعمله في نفسك, مش اللي السن بيفرضه عليك, انا أخترت اني اسهل علي نفسي و أتعامل مع الناس بطبيعيه أكتر, وده غلط و هاحاول اغيره, علشان أحنا المفروض نعمل الصح, مش الأسهل.. مقدرش أقول إنك لما تختار انك ماتعملش زى ما كل الناس بتعمل, و مترميش زباله في الشارع.. و تمشي شايلها في ايدك نص ساعه لغاية متلاقي سله, وبيبقى شكلك اهبل جدآ بالمناسبه, مقدرش اقول ان ده حب للتظاهر بالإختلاف, او إستمتاع بالإختلاف مع الأخرين.. لأ ده تمسك بعمل الصح, حتي لو كان صعب, وحتى لو كان شكله شاذ, وحتى لو مش هيخلي الشوارع أنضف أو الناس كلها تعمل كده.. اهو الواحد بيعمل اللي عليه و خلاص..صح؟
زي ما دامبلدور قال.. الناس عندها دايما اختيار بين انها تعمل الحاجه الصحيحه, او الحاجه السهله
يا ست واحده.. فيه لازمه لإني ادخل في مناقشه عارف نتيجتها.. في احتمال اني فعلا اقنع اللي قدامي بحتى جزء من وجهه نظري, و في احتمال اني بعد عشرين مناقشه و فتره زمنيه لا بأس بها اقدر فعلا اغير من الشخص ده, و أقنعه بنسبه كبيره بوجهة نظري, و ده بيحصل فعلا بس على حساب صحة الواحد و أعصابه, و مدى قدرته على التحمل.. لكن بتحصل.
نفس الفكره ان لما الواحد بيفضل خنيق في تعامله مع الأخريين, ومحسسهم بمدى غبائهم طول الوقت.. فده في احتمال انهم لما بيعرفوا حقيقة الواحد اكتر, ويعدوا صدمة الانطباع الاول يبتدوا فعلا يقتنعوا واحده واحده بالافكار دي, او على الاقل يتقبلوها.. وده بينعكس على تعاملهم و بيسهل التعامل معاهم كتير, بعكس طبعا تقبل الأخريين و العيش في جحيم أبدي ملهوش نهايه زي اللى كلنا عايشين فيه دلوقتي لما نتكلم مع حد غير الأثنين او ثلاثة اصحاب القريبين قوي اللي بيفهموا الواحد.. ده رأيي يعني
Nice! Where you get this guestbook? I want the same script.. Awesome content. thankyou.
»
Nice! Where you get this guestbook? I want the same script.. Awesome content. thankyou.
»
Post a Comment
<< Home