ربنا .... عرفوه بالعقل

رحيل.....هجرة.....عزلنا......أى حاجة

2006-05-16T00:37:00.000+03:00

انت الآن فى طريقك إلى العنوان الجديد للمدونة.... سيب كل حاجة واصبر 5 ثوانى

You are being redirected to the new address of our blog.....

Please be patient and you will be there in 5 seconds

أن تكون علاء سيف

2006-05-15T04:12:00.000+03:00

علاء إتقبض عليه.. و شكله مبضون في السجن.. والناس كلها مش جايلها نفس تكتب حاجه.. وبعدين قبضوا على زُربيح ناس تاني.. و شكلها كده مفيش فايده

سقراط كتبت تدوينه تقطع القلب عن علاء.. و قرد الرمال قالب الدنيا وعامل حملات صليبية.. انا معجب جدآ باللي بيعمله, انا من زمان من أنصار نظرية ان %99 من أوراق اللعبه في ايد أمريكا.. وان كفايه و مش عارف مين من أجل التغيير و الكلام ده كله مكانش هيقدر يتحرك غير بضغط من أمريكا علي الحكومه, و الحكومه مش هتقدر تقمعهم في المظاهرات أو تحطهم في السجن غير بضوء أخضر من أمريكا.. من زمان كنت بقول الكلام ده, و باسمعه بيتردد دلوقتي و ديه حاجه كويسه بالنسبه لثقتي في نفسي.. المهم ده برضه بيعنى إن لو في أمل في تحرك للإفراج عن الناس دي فهيكون أحسن في الجبهة الخارجيه, تصعيد ضغوط أمريكيه أو غربيه عمومآ على الحكومه المصريه ممكن يحسن كتير في فرصة الإفراج عنهم بسرعة, أو الإفراج عنهم أصلا.. قرد الرمال بما إنه من اكتر المدونين المصريين شهرة في امريكا, إتحرك بسرعه و فاعليه.. لافتات, عرائض, رسائل للسفير المصري و ممثلي الكونجرس, مطالبات بقطع المعونة, و حتي مظاهرات و وقفات إحتجاجية.. مدونه كاملة لمتابعة الموقف (هيه صحيح علي بلوج سبوت.. و متخيل علاء بيشخر في سجنه لما يعرف).. يعني موضوع الرسائل و العرائض ده طبعآ للأجانب أكتر, لكن في حاجات تاني ممكن نعملها.. مدونين كتير عرب و أجانب بدأوا يتفاعلوا.. و الأفكار النميسه بدأت تطلع, دي بالذات سهله قوي و ممكن كلنا نعملها: تلغيم جووجل علشان علاء .حتي مواقع التكنولوجيا بره إتحط فيها أخبار عن علاء, ديج و سلاش دوت, ولو تعرفوا معنى سلاش دوت.. كمان الملفت للنظر في موضوع مخاطبة الجبهة الغربية ده, ان منال مكتبتش ولا تدوينة واحدة بالعربي لغاية دلوقتي, و كل اللي كتبتة كان بالإنجليزي و موجه للأجانب بشكل واضح, حتى إبليس بيطلب المدد

أما عن علاء

للأسف أنا مبعرفش علاء بصورة شخصية علشان أتكلم عنه زي ما كتير من المدونيين عملوا.. وهوا ميعرفنيش ولا يعرف عني حاجه علشان أتكلم عنه, بحس إنها قلة أدب يعني

بس أنا بعرف عنه معلومات كتير جدآ.. من اللي هوا بيختار انه يشاركه مع الناس علي الويب, وقريت لة تقريبآ كل الحاجات اللي كتبها في موقعه, و تعليقاته عند الناس اللي بقرالها, و حتي بسمعه و هو بيتكلم و بيدردش في غرفة ال أي أر سي بتاعة مجموعة مستخدمي لينكس, فا أنا هتكلم عن علاء بالنسبه ليا.. مليش دعوه اللي هكتبه ده دقيق ولا ﻷ, صح ولا غلط, مفيد ولا ﻷ.. خالص , دي مش رساله لعلاء في المعتقل, ولا رساله لمنال تشد حيلها, ولا إعلان عن حالة الإنبضان اللي أنا فيها من البلد, ولا أي حاجة. أنا بس عايز أتكلم عن علاء اللي أنا أعرف عنه, مش اللي بعرفه.. زي ما مش فاكر مين كان بيقول: هراء شخصي بحت

من تلت سنين تقريبآ كان أول مرة شفت أسمه علي موقع لينكس إيجبت, لفت نظري أن لسانه طويل جدآ, دى أول حاجه, و إنه كان من أكتر الناس اللي بتفهم تقنيا في الموقع, و الأمضاءات الغريبه بتاعته اللي لغاية دلوقتي مش فاهمها, "حلمت إن البنت اللي بتقول رصيدك في موبينيل إسمها غاده و من الخصوص" حاجه منيله كده

دارت الأيام, و فتحوا ال لج, و أستمر علاء يلفت نظري بإنه دايمآ أكتر واحد بيقول رأي صح, ساخر جدا من كل الناس, قليل الأدب جدآ.. بس في الأخر هو أكتر واحد بيفهم في اللي بيتكلموا.. ماشي هوا ليه مجال تخصصه, و ناس تانيه متخصصه في حاجات تانيه.. بس دايمآ كنت بحس إن هوه عنده فكره كويسه في كل المجالات,و دايمآ الأدق و الأصفى ذهنا في كل اللي بيتكلموا

الصوره دي بالذات كنت بحلم إني أكونها من زمان.. الشخص اللي بيعرف عن كل حاجه تقريبا.. بيفهم قوي في مجاله, واثق من نفسه لدرجة إنه مش محتاج تقدير من حد, قليل الأدب و تحس ان عنده مشكلة أتتيود لغاية متعرفه أكتر

حاولت كتير اني أكون الشخصيه دي.. قدرت إني أكتسب كتير من سلبياتها و قليل من إيجابياتها.. و كنت فرحان

لغاية معرفت إن في علاء

كانت أول مره أأقدرمصطلحات زي القدوه, و المثل الأعلى و الحاجات دي, بجد كانت أول مره أفهمها.. أهو قدامك, أكبر مني بكام سنه, في نفس البلد و من طبقه إجتماعيه مقاربه, و قدر يحقق كل حاجه بحلم أحققها و أكتر بكتير

يعني صدمه لذاتي المتضخمه شويه بس تقبلتها, لأنه كان أحسن بكتير من إنه يتكره

دارت الأيام و بدأ ربيع التدوين في مصر.. مش أكتر من سنه أو سنه و نص ولا حاجه قبل ما الكائنات الغريبه تبتدي تهاجم المجتمع, و الحرس القديم يبتدي يمشي أو يكتب قليل جدآ

صدمه تانيه كانت مجتمع التدوين في مصر بالنسبه ليا.. قد أيه في ناس بتفهم في البلد دي, بعد ما الواحد كان فقد الأمل

لما بفكر بلاقي إن أنا فهمت التدوين غلط.. أنا كنت بعرف عن المدونات بره, و بتابع كذا حد, بس كنت ببص للبلوجز إنها تطور تكنولوجي مش أكتر, طريقة أسهل و أنسب لتبادل المعلومات على الويب.. وكل واحد حر يكتب اللي هوا عايزه عن اللي هوا عايز يكتب فيه. لكن المدونات المصريه كنت ببصلها إنها النافذه اللي لقيت فيها ناس, أنا شايف إنها بتفهم, و شايف إن أرائها قريبه كتير من أرائي في معظم المواضيع, وإن كانوا بيقدروا يعبروا عنها أحسن مني بكتير, و عندهم معلومات و خبره حياتيه أكبر بكتير.. يعني يمكن نقطه مهمه هنا إن الجيل الأول للمدونين كانوا أصلا أصحاب أو بقوا أصحاب و أثروا في بعض شويه.. بس ميمنعش, مجموعه من الشخصيات الخارقه للطبيعه

المهم إني لقيت إن علاء كمدون من دول من أكتر الناس اللي بيعجبوني و بحب أقرالهم, و بستني التعليق اللي بيقولو عند أي حد.. لغاية الوقت ده أنا مكنتش أعرف عن علاء غير الجانب التقني.. مكنتش أعرف أي حاجه عن حياته الشخصية أو بمعنى أدق شخصيته و أرائه و إتجاهاته الفكرية

مع إنه مبيقلش علي نفسه إنه مدون, و كان بيستغرب إن الناس بتعجب بالحاجات إللي بيكتبها بعيد عن السياسه و جنو/لينكس لكن أرائه كانت دايمآ صح. مكنش بيغلط أبدا.. سواء في الموسيقى(الحته الوحيده في البلد الجميله دي اللي لقيت فيها ألبوم لفتحي سلامه كان عند علاء), الأدب, السياسه, الدين, أحوال المجتمع.. طبعآ أنا عارف إن الحاجات دي كلها مفيهاش صح و غلط, و كل واحد يقول رأيه زي ما هوا عايز, بس أنا بتكلم بالنسبه ليا, كنت دايمآ بلاقي الحاجات اللي كنت بافكر فيها, أو حاجات معرفهاش بس عاجباني جدآ و مقدرش أختلف معاها.. و ده كان شعور جديد بالنسبه ليا.. كواحد عايش طول حياته مقتنع أنه أكتر شخص بيفهم مش هقول في الدنيا, بس علي الأقل في كل اللي بعرفهم, و غالبآ لسه هعرفهم(دي طبعآ لسه حقيقه لغاية دلوقتي, مش إن أنا مقتنع, ﻷ إن أنا كده فعلآ) ما عدا علاء.. يعني يمكن بعد شوية تدوينات شخصيه جدآ لعلاء زي "صعود و صعود مملكة منال و علاء" قدرت أتفهم هوا إزاي كده.. لو أنا نشأت في البيئه إللي هوا طلع فيها, ولو كان أهلي عاملين كده, وكنت في نسور صغيره و أنا صغير يمكن كانت حالتي هاتبقى أحسن, فعلآ كويس التفسير ده

جه إبريل, و بدأت المظاهرات, و تألق علاء أكتر.. و إن كان بينفي دايمآ صفة المناضل أو الثوري أو المثقف أو كل الهجص ده الراجل كان بينظم, ويتعب, و يتضرب و يتسرق من سكات.. لأ ياريت من سكات, يقعد يجاهد ضد أشكال الحياه الغريبه اللي بتدخل تبضن في الموقع بتاعه.. حقيقي نفسي أفهم بيستحمل إزاي

هل علاء شايف إن البلد ممكن تتغير, ولا بيعمل اللي عليه و خلاص, مش عارف.. متهيألي بيعمل اللي عليه وخلاص, مش بيعمل اللي عليه و خلاص, بس بيبص للموضوع بطريقه عاطفيه مش عمليه, و إن كان دايمآ بيحاول بيحسن من الأداء للوصول لأحسن نتيجه, بس هوا عارف أن الموضوع ملهوش تأثير مباشر, بدليل تسمية حركة 30 فبرير

لعلاء طريقه ظريفه جدا في النقاش, مش هأجزم إني فاهمها, بس حاسس إنها قريبه من طريقه بعرفها لأني باحاول أستخدمها.. بخلفية المبرمج, هوا بيحاول الأول إنه يوضح كل المصطلحات اللي في الكلام لكل الأطراف اللي في المناقشه, بعد ما كل الناس تتفق عليها, يبتدي يختزل الموضوع لأقل مساحه ممكنه, بمعني أنه يخلص الموضوع من الأجزاء اللي مش متعلقه بيه بشكل مباشر, و يوضح للطرف التاني وجهة نظره من كل الأجزاء و هوا قصده إيه لما يتكلم عن النقطه دي, بغض النظر الطرف التاني متفق ولا ﻷ المهم نفهم كل واحد بيتكلم في أيه.. بعد كده هيقدر أنه يوصل في النهايه لأن الطرف التاني فهم إزاي هو وصل للنتيجه دي, لو الطرف التاني بيفكر بمنطق, هيتفق معاه, لو ﻷ, و ده غالبآ الوضع.. هيقع منه في حته و يدخلوا في دوامه من الشتيمه

حرية.. أكتر كلمه بحس إن علاء بيعبر عنها , مش عارف ليه

زهقت من الكتابه, و التدوينه طالت بشكل مفزع.. أراهن إن حتى كبريت مش هايوصل لغاية هنا, و بعدين حاسس إني بنت مراهقه بتكتب في مذكراتها عن مدرس التاريخ.. شعور سخيف

علاء....من الأخر.. لك أشد التقدير و الإحترام

and for egypt, our dear beloved egypt, may god forgive you for what you'r doing to us, and would you please tell them to set the guys free. am sure you have some good contacts up there

بالمناسبه دي هاتبقى أخر تدوينة لينا هنا, هانعزل ل ورد برس.. فا ياريت التلاته اللي بيقرولنا يغيروا العنوان عندهم ل http://useyourhead.wordpress.com/

شم النسيم و عمى الألوان

2006-04-24T10:53:00.002+03:00

أيوة..... أنا عندى عمى ألوان يعنى مش بعرف الأخضر من الأحمر من القرمزى ( ايه القرمزى ده؟) ... و النهاردة شم النسيم يعنى الزهور و الألوان و الكلام ده.... ماليش فيه... أنا كل اللى ليا حاجة أفتح من حاجة أو أغمق يعنى أقرب للأبيض أو للأسود( مش معنى كده إن الدنيا عندى أبيض وأسود زى أفلام اسماعيل يس). شوف الدنيا زييى هنا أو هنا .

عمى الألوان هو عيب خلقى متوارث من الأب عن طريق ابنته لابنائها الذكور (يعنى جدى أبو أمى -الله يرحمه بقى- كان عنده عمى ألوان ، و ابن خالتى أيضا .... اتفرج علينا-ابن خالتى و أنا- و احنا قاعدين قدام المودم نشوفه بينور أحمر ولا أخضر) لكن الإناث عمرهم ما بيبقى عندهم عمى ألوان ( عمى الأخضر-أحمر) الموضوع عبارة عن ان المخاريط اللى بتحلل الضوء و بتفصل الألوان فى العين عشان المخ يقدر يميزها بايظة أو مش فى مكانها الصح....حاجة زى كده.

كل مرة أروح لدكتور العيون يجيبلى ورق عليه أشكال هلامية و يسألنى بمنتهى البراءة : شايف ايه هنا؟؟؟ و أنا مش شايف غير شوية كور ملونة ، يقوم يقوللى فيه عدسات و عمليات... و لكن أنا أشك .... الراجل أحول بطريقة غير طبيعية ..و بيقوللى البس النضارة!!! و أنا لا أستطيع أن أثق فى كلامه عن العيون ولكنى أذهب اليه فى كل مرة لأنه دكتور كبير و تقريبا مفيش حد خد باله قبل كده إنه أحول... أحول جدا... جدا....

الجنود اللى عندهم عمى ألوان طبعا ممكن يعملوا كوارث فى المعركة بداية من قراية الخرايط و تشغيل الأجهزة لغاية ترجمة الإشارات الضوئية الملونة و لكن الجنود دول بيقدروا يشوفوا الهدف المموّه فى خلفية كثيرة التفاصيل و مشوشة أحسن من اللى بيشوفوا ألوان كويس.

أكتر حاجة تفقع هى رد فعل الناس فى العيلة أو الأصحاب تجاه الموضوع ده .. تبدأ الأسئلة الغريبة و كأنّى كائن فضائى أو كأنّى كنت عايش قبل كده مع الحيتان.... أسئلة من قبيل.. القميص ده انت شايفه لونه ايه؟؟(و القميص أصلا كاروهات 64036431847 لون) .... أنا عينيا لونها إيه؟؟.... يعنى انت شايفنا ألوان ولا أبيض و أسود؟؟؟ ...أو الناس تبدأ تشخص الحالة... "انت أكيد محدش حفّظلك الألوان و انت صغير" .... " دى حالة نفسية" .... "انت بتستعبط أصلا" .... بردة حاجة تفقع لما الناس تاخد الموضوع على انه حاجة لطيفة فيها مجال للاستظراف و خفة الدم

نهايته......أنا طبعا عندى فضول فظيع إنّى أشوف الدنيا ألوان و أحس بيها زى الناس... يمكن نظرتى للحياة تتغير و أحب الدنيا لمّا أشوفها ألوان و لكن أنا مش ناقم ولا زعلان ... الموضوع مش كبير قوى يعنى...

بس خلاص

عن الطبيعيات

2006-04-01T22:20:00.000+03:00

الطبيعيات .... وبعضها مخالف للشرع والدين والحق ،فهو جهل وليس بعلم حتى نورده في أقسام العلوم ،وبعضها بحث عن صفات الأجسام وخواصها وكيفية استحالتها وتغيرها ،وهو شبيه بنظر الأطباء ؛ إلا أن الطبيب ينظر في بدن الإنسان على الخصوص من حيث يمرض ويصح ، وهم ينظرون في جميع الأجسام من حيث تتغير وتتحرك ؛ ولكن للطب فضل عليه وهو أنه محتاج إليه . وأما علومهم في الطبيعيات فلا حاجة إليها فإذن الكلام صار من جملة الصناعات الواجبة على الكفاية حراسة لقلوب العوام عن تخيلات المبتدعة وإنما حدث ذلك بحدوث البدع كما حدثت حاجة الإنسان إلى استئجار البذرقة في طريق الحج بحدوث ظلم العرب وقطعهم الطريق ؛ ولو ترك العرب عدوانهم لم يكن استئجار الحراس من شروط طريق الحج ؛ فلذلك لو ترك المبتدع هذيانه لما افتقر إلى الزيادة على ما عُهد في عصر الصحابة رضي الله عنهم

الإمام أبى حامد محمد بن محمد الغزالى

إحياء علوم الدين

باب العلم العينى- العلم المذموم و المحمود

*****

وقع فى يدى هذا الكتاب أثناء استراحة قصيرة من مذاكرة "الموجات" و ما فيها من تعقيد مما يرفع الضغط ويضيّق الخلق...(نعم ياخويا؟؟؟؟) أنا أذاكر و(يطلع دينى) فى التكاملات و النظريات و كنت أصبّر نفسى ... (كلّه فى سبيل العلم) ، ثم يأتى المستر (غزالى) و يقول :"لا حاجة له " !!!! (ياخى *** ).....

*****

تصفحت الكتاب و إذا بكثير من هذه السخافات التى لم أتمالك نفسى من الضحك عندما قرأتها ( حقيقى)

*****

" من لم يملك الإحياء فهو ليس من الأحياء" .... عبارة توضح مدى أهمية الكتاب للحياة على كوكب الأرض.... (طب ** ***).

*****

هذا الكتاب كُتب فى القرن الخامس الهجرى ، يعنى أنه من الممكن أن بعض العقول كانت تتقبل هذا الهراء ولو أنه كُتب بعد عصر ابن سينا و الحسن ابن الهيثم ولكن ( من باب المبالغة يعنى) يمكن اعتبار أن الكتاب لم يكن بهذا الغباء وقتها.

و لكن السؤال هنا : كيف يفكر من يقرأ هذه السخافات الآن و لا يعترض عليها بل و يصدقها و يؤمن بها ؟ كبف يفكر من يأخذ كلام الغزالى و محمد بن عبد الوهاب و ابن تيمية و .... ابن باز و ابن عثيمين باعتباره "الدين" و"الشريعة" ؟

فلو أننا طبقنا هذه "الشريعة" لأحرقنا أحمد زويل و النشائى و مصطفى مشرفة الذين يشغلون عقول العوام بكلام فارغ عن الإلكترونات و جسيمات متناهية فى الصغر تتلاشى و فراغات لا نهائية الأبعاد و أشياء من هذا القبيل ( تذكروا أوروبا ما قبل عصر النهضة) .

*****

ناقش " نجيب محفوظ" موضوع العلم و الدين وعن أنهما لا يتعارضان فى رواية " أولاد حارتنا" بعبقرية... أرشحها للقراءة.

*****

تهنا و نسينا الطريق- إنكسر جوانا شيء

2006-03-28T03:46:00.000+02:00

انتزعتني من خواطري فتاتان مرتا أمامي في نشاط دون أن تعبئا بالمطر. ذكرتاني على الفور بالمرأة المصرية في الستينات و السبعينات, سافرة الوجه, عارية الرأس, مزهوة برشاقتها و أنوثتها أما الأن فهي تمشي متعثرة مضطربة الخطى, غالبا ما تستند بيدها أو جسدها كله إلى أقرب جدار, تئن من الحرارة الخانقة تحت وطأة الملابس السابغة التي تغطي أجساما نفخها طعام غير صحي و حياة بلا رياضة تحفل بصنوف العلل, ينقضي جزء كبير منها في مقعد أمام التليفزيون أو متمرتسة في سيارة يقودها زوج مكتئب أو منكمشة في ميكروباص يحملها من عمل ممل طوال اليوم إلى مسكن في حي عشوائي, وقد اكتسب وجهها الأسمر المنتوف الشعر جيدا أسفل الحجاب شراسة ينطلق عنانها في معارك الصراعات الصغيرة

صنع الله إبراهيم أمريكانلي

دعوة للامتناع عن سداد فاتورة تليفون ابريل 2006

2006-03-22T23:59:00.000+02:00

بقى اللى حصل ان اشتراك التليفون غلى من 24 ل 30 جنيه ... ده "قانونا" من حق الشركة المصرية للاتصالات و اللى مش عاجبه ممكن يقاطعهم .... و حصل كمان إن فتح المكالمة غلى من 5 لـ 6 قروش, يبان كلام عبيط لكن هيفرق معاك لو انت رغاى شويتين و هيفرق كتير مع المصرية للاتصالات فى ايراداتها.. بس برده "قانونا" من حقهم و احنا مضينا على العقود من غير لا قراية ولا بتاع فلازم نتحمل نتيجة ده . ده غير ان الضرايب و الدمغة و الذى منه بيتحسب على كل ده . لكن يا أخى اللى مش قادر ابلعه أن التسعيرة الجديدة سارية من أول الفاتورة الجاية (فاتورة ابريل يعنى) ...الفلوس اللى هندفعها دى هى تمن مكالمات اتكلمناها شهر نوفمبر و ديسمبر و يناير اللى فاتوا ..يعنى من 5 شهور.... تؤ تؤ ......... أهو كده بقى ما ينفعش ...طب مش كنتوا تقولوا فبل كده شوية عشان مخدش راحتى فى الكلام؟ أو حتى أقرر اذا كان عاجبنى أدفع و لو مش عاجبنى أقاطعكوا..لكن كده بأثر رجعى؟؟؟ كده قلة أدب...و عندا فيكوا انا مش دافع الفاتورة دى و انا عارف ان آخركوا هدفع غرامة عشرة جنيه بالتقسيط . لازم نعرف اننا لينا حقوق و لازم ناخدها ..أى نعم كان من باب أولى نعمل كده لما السكر يغلى لكن ده اللى نقدر نعمله أنا أتسرق أه ... إنما آخد على قفايا وأنا بتسرق .... لا!!!! فيه حاجة ممكن نعملها برده غير أننا مش ندفع الفاتورة(صعبة دى!!) هى إننا نتصل برقم 111 و بعدين 6 و نحاول نوصل لهم اننا مش هندفع الفاتورة على النظام الجديد ده ....... مع العلم ان خدمات الاتصالات المفروض انها ترخص مع تقدم التكنولوجيا و زيادة عدد المستهلكين

بيـنا يا جدع, ننزل الميدان

2006-03-18T03:44:00.000+02:00

الجدع جدع, و الجبان جبان. بينا يا جدع, ننزل الميدان بصوا, مش هتكلم عن تفاصيل لأن أكيد في ناس كتير هتكتب أحسن مليون مرة, ممكن أحط وصلات بعد كده, ولا هتكلم عن موقف القضاه اللي لازم نحترمه بجد و نتحمس معاهم شويه (المقال ده جامد قوي عن إزاى إن القضاة هم فعليآ الأمل الأخير) بس أنا عايز اتكلم عن شوية حاجات لاحظتها قبل ما أنسى.. اجمل حاجه حسيتها في ال "قعدة" دي, نظرات الناس اللي كانوا في الشارع, سواقين التاكسيات اللي كانوا بيهدوا على جنب, و أحيانا يقفوا دقيقه ولا دقيقتين, يسمعوا الهتافات, و يقروا اليفط, يسمعوا "يسقط يسقط حسني مبارك" فى وسط ميدان التحرير, ومفيش أمن محاصرنا ولا بيقبضوا علينا.. ركاب الاتوبيسات اللي كانو بيبصوا علينا ويفتحوا الشباك علشان يسمعوا, نظرات الدهشه و الاستغراب في وشوش الناس إللي في العربيات, مش علشان مظاهرة وخلاص, الصبح قدام النقابة مكانش حد معبرنا, خلاص بقى مشهد مألوف, لكن البيات في الشارع, في ميدان التحرير, جامده فشخ.. كان نفسي أسمع الناس بتقول ايه, مجانين, رجاله, مفيش فايده, احنا فعلا سمعنا كذا "ربنا ينصركوا" و "ربنا معاكوا" من الناس اللي معديه.. منظر الناس اللي ماشيين على الرصيف التاني الصبح, رايحين شغلهم, وبيقفوا دقيقه يبصوا و بعدين يكملوا مشي, بيفكروا في ايه و هما ماشيين, وازاي هيحكوا لزمايلهم في الشغل و اهلهم في البيت لما يروحوا.. الصبح و هوا بيطلع علينا, أنا محدش يقدر يتهمني ان عندي اي نوع من انواع المشاعر, بس فعلا اتأثرت, الناس بتصحي والشمس بتنور واحده واحده, البرد الغير انساني بيدوب في الشمس, استعاده الشعور باعضاء مهمه من الجسم كنا فقدنا الاحساس بيها من زمان من كتر القعده على النجيله المتلجه, صوره إليسا العملاقه وهي بتنور واحده واحده, مخلياها من عالم تاني, فعلآ منظر مؤثر. كمية المدونين اللي قابلناهم, واللي فعلآ اتكلمنا معاهم, غالبآ هاكتب بوست عن الموضوع ده قريب, بس شعور انك تقعد جنب علاء و يسألك تليفونك نوعه ايه ويغني حتت من الاغاني اللي بتغنيها, و انك تشوف إبليس(اللي دي غالبآ أول مرة يحضر مظاهره) وتعرف ان الحافظيه دي خدعه, عمرو و احمد غربيه, مالك و يحيى مجاهد, واحده مصريه و إحتمال سقراط (مش متاكدين), عمرو عزت و عبد اللة النديم. شوية رفايع كده بقى, ازاي محدش بيقعد لوحده وكله بيتعرف على بعض ونقعد مع بعض, و نتناقش ونتفلسف ونغني مع بعض, الناس اللي كانت عماله تعزم علينا باكل و مياه و عصاير, فعلا كمية اكل اكتر من اللي في بيتنا, يخرب بيت أغاني منير و الشيخ إمام اللي إتغنت, اه و إني ألاقي بني ادم بيسمع طنبورة و نقعد نغني مع بعض.. اووف, كتير والله في الأخر كل اللي هاقوله, انا عارف ان شكلي ممكن يكون محدث, بس دي مكانتش مظاهره و خلاص, حتى الشعار كان عاجبني طحن, "عش ولو ساعات في منطقة محررة", كانت حاجه أكبر بكتيير من مظاهرة.. كانت قعده.. ربنا يعيد اليوم ده تاني

مبروك يا عريسنا

2006-03-02T19:53:00.000+02:00

مبروك يا عريسنا

يابو شنة و رنة

يا واخدنا وراثة

افرح و اتهنا

و اطلع من جنة

حود على جنة

مش فارقة معانا

ولا هارية بدننا

ولا تاعبة قلوبنا

ولا فاقعة بضاننا

يا عريس الغفلة

اطلب و اتمنى

ماحناش كارهينك

لكن عارفينك

حتكمل دينك

وتطلع ديننا

شعر العظيم : أحمد فؤد نجم

اسمع الفاجومى يلقيها:حمل ملف الصوت

و شاهده أيضا :حمل الفيديو

يوم 27 فبراير 2006

ساقية عبد المنعم الصاوى

صلاة الجمعة........ تانى

2006-02-03T23:28:00.000+02:00

قرأت اليوم هذه التدوينة للأستاذ الكبير : شريف عبد العزيز . تقريبا ده اللى حصل النهاردة فى أحد مساجد القاهرة هنا ولكن أنا كنت أقل أدبا من ا/شريف و كان الشيخ مصدوما من جرأتى و كان الحوار كالاتى : أنا (الدخلة لازم تكون مؤدبة) : لو سمحت أنا عايز أسألك عن موضوع المقاطعة و الدعاء , هل ده هو اللى المفروض نعمله لما حد يشتم الرسول؟ هو : لا إحنا لازم نجاهدهم لغاية لما يعرفوا أن الله حق أنا (فى نفسى) : يخرب بيتك انت دماغك راحت فين ؟ هو (مكملا) : و كدة ننتصر لرسولنا. أنا ( وأنا أتذكر): لا أنا مش قصدى كده ... أنا قصدى إننا كنا مش لازم نقوم الدنيا و نقعدها علشان ناس مش مؤمنين بيه أصلا يقولوا عليه بربرى و إرهابى و بتاع حريم .... المفروض أننا كنا نستغل أن الموضوع عليه ضوء و نحاول نظهر سماحة الاسلام و سماحة الرسول مش نقوللهم " إحنا فعلا إرهابيين و بنحجر على حريتكوا فى التعبير حتى جوه بلادكوا". ....كاد الرجل أن يسب لى الدين لولا أنه تذكر أنه منته لتوه من إمامتنا فى صلاة الجمعة.. لكنه اكتفى بالصراخ : حرية تعبير اييييييييييه؟؟ أنا : يعنى لو كان الرسول موجود دلوقت و حد شتمه كده... كان هيعمل إيه؟...... أكيد ولا كان هيأمر المسلمين بمقاطعة الجبنة ولا اللبن البودرة هو (مقاطعا) : أكيد كان أبسط حاجة أنه يدعى ربنا عليهم زى ما أنا عملت . أنا : أكيد الرسول ما كانش غبى كده ..( همهمة فى المسجد ونظرات نارية ثم لمحت صديقا لأبى يكاد يفترسنى بنظراته و أيقنت خطأى و كان أمامى طريقان : اكمال طريق قلة الأدب أو إعمال العقل قليلا و الخروج من المأزق بصنعة لطافة.... و إلى كل من لا يعرفونى ... أكيد كمّلت طريق قلة الأدب و أنا أتذكر) و قلت : أيوة ده غباء ... ( و كان صوتى قد بدأ يرتعش فأخفيت الارتعاش بالعلو ).. الرسول كان أكيد هيقابل الإساءة بالحسنى ... الرسول لما لقى راجل بيتبول جوه الجامع عملله ايه؟(*) هو : أنت بتخلط الأوراق. أنا : أوكى , الراجل اليهودى اللى كان على طول بيشتمه و يرمى عليه حاجات مش ولا بد .... هو : ده كان فى بداية الدعوة. أنا : أعتقد ان هى دى السنة !!!! هو : طب و حرق القرآن ...؟ أنا : ما احنا اللى خلينا " بعضهم " يعمل كده بغبائنا و جهلنا . هو : يعنى لو واحد نصرانى دخل الجامع ده و رافع صليب نعملّه إيه؟ أنا : نقولله لو سمحت يا باشا إحنا كده بنتضايق زى ما انت هاتضايق لو واحد مسلم دخل الكنيسة و يقول .. محمد رسول الله . هو : يا حلاوة .. أنا : أمّال نرميه من الشباك ؟؟ هو : على طريقتك دى هنبقى ملطشة ان شاء الله. أنا : و على طريقتك دى هنبقى فعلا إرهابيين فعلا و كمان عندنا حرب طائفية . هو (بالابتسامة الحنون ) : انت صغير فى السن و لسه شاب و بكرة تفهم دينك كويس أن شاء الله ( و ارتفعت الأصوات المؤيدة لهذا الرأى ). أنا : ملكش دعوة بسنى و كلمنى بالعقل. صوت من بعيد نادانى: ياللا عشان نقفل الباب .... (ثم صوت صديق أبى ): مش وراك كلية بكرة ولا مخلص؟ و هئ و مئ و حركات و سلامو عليكو ..و عليكم السلام.. و خرجت و أنا أتذكر ما فعلته بأحد أقاربى عندما جعلته يشترى ال(دانو) بدلا من ال (نيدو) لأن ال(نيدو) دانماركى... (*) دخل إعرابي مسجد رسول الله صلي الله عليه وعلي آله وسلم فبال في ناحية من نواحي المسجد والناس يشاهدون فقام الصحابة يزجرونه فقال النبي صلى الله عليه وعلي آله وسلم لا تزرموه إي لا تقطعوا عليه بوله دعوه يكمل بوله ويكون بوله في مكان واحد فلما قضي الإعرابي بوله قال النبي صلى الله عليه وعلي آله وسلم للصحابه أريقوا على بوله دلواً من ماء ليطهر المكان ثم دعي الأعرابي وقال إن هذه المساجد لا يصلح فيها شي من الأذى والقذر إنما هي للصلاة والتسبيح وقراءة القران .

to all of you who asked me to boycott danish products

2006-02-02T00:55:00.000+02:00

thanks to sandmonkey

عن التغير, وما إلى ذلك

2006-01-24T16:41:00.000+02:00

هل من الأفضل أن نتطور وننضج أم لا؟؟ اعتقد إن الإجابه الطبيعية و المباشرة هي طبعآ, لازم الإنسان ينضج و يكبر ويعرف إزاي يتعامل مع الناس.. لكن لما برجع أفكر في الموضوع ألاقي إنه مش شرط. أنا عن نفسي كنت زمان بتصرف في حاجات كتير بطريقة "مختلفة", لما ببص علي نفسي اليومين دول بلاقي اني بقيت بتصرف بطريقة اكثر طبيعية لمجاراة الناس, علشان يبقي شكلي مقبول اكثر.. أنا عارف إن الموضوع ده معقد قوي, ومهم لكل الناس, بس مش ده اللي انا عايز اتكلم فيه. انا عايز اتكلم عن موضوع فرعي منه وهو التعامل و طريقة التصرف مع الناس.. مش تطور شخصية الانسان عمومآ. هل المفروض اننا ننضج في تعاملنا مع الاخرين, مما يعني التنازل عن جزء كبير من الصفات الشخصيه المميزه لنا كأفراد, فى مقابل تقبل الأخرين, ولا التمسك بالصفات دي(اللي جزء كبير منها غلط بالنسبه لمعظم الناس, بس أنا مؤمن انها صح) في مقابل الحفاظ علي شخصياتنا الفريده. هل هدفنا إننا نقرب المسافات بيننا علشان نتفاهم مع بعض اكتر, ولا ان احنا نخلي المسافات دي زي ماهيه في مقابل ان احنا نطور من نفسنا عن طريق تمسكنا بافكارنا و سماتنا المميزه, و في نفس الوقت تقبل اختلافات الاخرين. اللي فكرني بالموضوع ده اني بقيت دلوقت لما باتكلم مع حد نص أعرفه.. نعرف بعض بص مش أصحاب قوي يعني.. او حد في اطار العائلة مثلآ, لقيت إني بقيت بقدر اتكلم معاهم (شويه) بطبيعيه.. باستحمل كلامهم اللي انا عارف انه كتير بيبقى يأما غلط او غبي, و بأتناقش في المواضيع الغبية و القصص الممله اللي بيتكلموا فيها,و أسمع ذات نفس القصص اللي سمعتها قبل كده و أعمل أني بسمعها أول مره بدل ما أرد عليهم برخامه إني سمعتها قبل كده.. و كتير بأكبر دماغي اني ادخل في مناقشات عارف انها هتطول علشان اقنعهم بوجهة نظري اللي انا متأكد انها صح. الناس بدأت تلاحظ ده وبتقول اني كبرت.. وبقي شكلي انسان طبيعي اكتر من زمان. هل دي حاجة كويسة؟ هل ده هدف.. انا فعلا من زمان زهقت من كتر مابيتقال عليا قد ايه انا مختلف وشاذ عن المجموع و دماغي بايظه, و كنت باحاول اني اغير من ده (بأني بس استحمل الناس اكتر شويه) و مكنتش بقدر, لكن دلوقتي بقيت باعرف.. فهل دي حاجه كويسه.. انى ابقي واحد تاني زي الناس (أو بس شكلي قدام الناس, بفرض اني مش هتغير من جوايا)..حاسس اني بخون نفسي, انا القديم اللي ياما صبر معايا واستحمل كلام الناس, اول مجتلي فرصة اتخليت عنه, وفي مقابل ايه.. مش كتير.. مش عارف,مضايقني قوي الموضوع ده و مش لاقيله حل, لما نرجع للكلام على التغيير على المستوي الشخصي ككل بافتكر جملة للدكتور أحمد خالد توفيق على لسان رفعت إسماعيل, مش فاكرها بالظبط لكن ده المعنى اللى فاكره منها: ان الناس دايمآ بتبقى مختلفه ومش متقبله المجتمع و هيه صغيره, لكن لما بتكبر بتتعلم التعامل مع الواقع بغبائه و مشاكله, و اللى مبيقدرش يتغير بيتحول لفنان, او ثوري... او مجنون

إنى داع فأمنوا

2006-01-13T13:47:00.000+02:00

اللهم يا منزل الكتاب ويا مجري السحاب ويا سريع الحساب ، ويا هازم الأحزاب أهزم النصارى واليهود ومن ساندهم المحاربين للإسلام والمسلمين ، اللهم أهزمهم وزلزلهم , اللهم أقذف الرعب في قلوبهم , اللهم فرق جمعهم ، اللهم شتت شملهم , اللهم خالف بين آرائهم , اللهم أجعل بأسهم بينهم . اللهم أرنا بهم عجائب قدرتك , يا قوي يا قادر ، اللهم أذل الدول الكافرة المحاربة للإسلام والمسلمين ، اللهم أرسل عليهم الرياح العاتية , والأعاصير الفتاكة , والقوارع المدمرة والأمراض المتنوعة . اللهم أشغلهم بأنفسهم عن المؤمنين ، اللهم لا تجعل لهم على مؤمن يدا وعلى المؤمنين سبيلاً ، اللهم أتبعهم بأصحاب الفيل وأجعل كيدهم في تضليل ، اللهم أرسل عليهم طيراً أبابيل , ترميهم بحجارة من سجيل ، اللهم خذهم بالصيحة وأرسل عليهم حاصباً ، اللهم صب عليهم العذاب صباً ، اللهم أخسف بهم الأرض ، وأنزل عليهم كسفاً من السماء اللهم أقلب البحر عليهم ناراً ، والجو شهباً وإعصاراً ، اللهم أسقط طائراتهم ، اللهم دمر مدمرا تهم ، وأجعل قوتهم عليهم دماراً يا ذا الجلال والإكرام يا حي يا قيوم . اللهم أن بالمسلمين من الجهد والضنك والضيق والظلم مالا نشكوه إلا إليك ، لا اله إلا الله العظيم الحليم , لا اله إلا الله رب العرش الكريم ، لا اله إلا الله رب السموات ورب الأرض ورب العرش العظيم .

اللهم انصر الإسلام والمسلمين اللهم انصر الإسلام والمسلمين اللهم انصر الإسلام والمسلمين

فى كل صلاة جمعة أسمع الإمام يتقرب إلى الله بهذا الدعاء مع بعض المكاء و التصدية اللذان يصمّا الآذان... والناس تردد بعد كل جملة :" آ آ آ آميييييين" و كلها أمل فى الله أن يستجيب. أوليست هذه هى العنصرية بعينها ؟ أيريد الله منكم أن تدعوه بهذا الدعاء؟ أسيستحيب لكم؟ أوإذا استجاب لكم , أفهذا رضا منه عليكم و رحمة؟ لماذا هذا الدعاء أصلا ؟؟؟.... انتقاما منهم لأنهم " أعداء الله و الإسلام " ؟ ... أم انتقاما لأنفسكم من محتقريكم الذين هم أعلى منكم شأنا و الذين لا تملكون عليهم الاّ هذا الدعاء؟؟؟ .... أم أن هذه محاكاة لما تتمنونه ( فى صورة طلب) ثم التشفّى على الطلب بما أن التشفى غير متاح فى الواقع؟؟؟ أوكى , بما أنكم تطلبون من الله أشياءا هلامية و معجزات قوم صالح و لوط ونوح .... و بما أنه (احتمال) يستجيب لكم, فلماذا لا تدعونه أن يهديهم أجمعين و يصبحوا كلهم ( مسلمين -> سنّة -> صناع حياة) أيضا ؟؟ فالله القادر على الأعاصير و الزلازل بالتأكيد قادر على هدايتهم . أو حتى لم لا تطلبون منه أن يصلح العلاقات بينكم و بينهم و أن يكفوا عن ضربكم على .....؟ أو يكفيكم شرهم و خلاص؟ حتى فى دعاءكم تظهرون عدائكم ؟ ونستغرب لماذا يقولون عنا أننا بربرهمجيون وحشيون؟؟ فإذا كان هذا أرقى و أرقّ ما نفعله (مناجاة الله ) فماذا لو كان بيدنا الأمر و فعلنا؟ لقد وصل العجز و قلة الحيلة بكم إلى هذا .. أن تتمنوا المعجزات لتفعل ما لم تستطيعوا فعله أو حتى لم تستطيعوا أن تتمنوا أن تفعلوه بأنفسكم لقد وصل العجز بكم أن تريحوا مؤخراتكم على حصير المساجد و ترددوا : آمين... آمين.. ثم تتثائبوا من تأثير قلة النوم (ليلة الخميس) وأنتم تمسحون وجوهكم بأيديكم ثم تقيموا الصلاة و تعودوا لبيوتكم آملين فى النصر و الازدهار و طبيخ يوم الجمعة... هيهات هيهات !!! بالنسبة لمبدأ الدعاء : فأنا رأيى أنه فى المقام الأول عبادة لا علاقة لها بتحقيق أى شىء إلاّ فى مواقف محدودة و ظروف نادرة ,فالأمر ليس و كأنه إذا أراد أحد شيئا ما أن يدعو الله فى سؤال هذا الشىء.. ما كانش حد غلب. و لكن علينا أن نصنع الكعكة ثم نضعها فى الفرن ثم ندعوا ألاّ تحترق بل و نظل نراقبها حتى لا تحترق. يحضرنى الآن مشهد "عادل إمام" فى "طيور الظلام" ... اللهم شتت شملكم..........آمين و فرق جمعكم ....... آمين و اجعلكم حبظلم بظاظا..... آمين

مع الاعتذار لعشاق الرباعيات

2005-12-25T19:44:00.000+02:00

طول عمرى بعتبر رباعيات صلاح جاهين أجمل كتاب فى الحياة و عمرى ما قريته إلا و لقيت رباعيات جديدة بتخبط فى دماغ الواحد زى قالب الطوب أنا اللي بالأمر المحال اغتوى...شفت القمر نطيت لفوق في الهوا...طلته؟؟؟ لا والله مطلتوش و وقعت على جدور رقابتى فى الوحل.......مانا كنت واقف أبص ع القمر من بعيد كان لازم يعنى أعمل فيها بتاع و أنط ؟ ليه يا حبيبتي ما بيننا دايما سفر ؟؟ ده البعد ذنب كبير لا يغتفر ليه يا حبيبتي ما بيننا دايما بحور ؟؟ أكيد عشان دماغك وسخة و مش قادرة تفهمينى . رقبة قزازة و قلبي فيها انحشر ..... شربت كاس و اتنين و خامس عشر ... لا عرفت أظبّط دماغ من الخمرة ولا عرفت أفوق منها و فضلت كده.. مسطووووول . إيش تطلبي يا نفس فوق كل ده؟ حظك بيضحك وانتي متنكدة؟ ... الفقر هيفضل طول عمره فقر . في يوم صحيت شاعر براحة و صفا ....الهم زال والحزن راح و اختفي ......وبعدين صحيت على صوت المنبّه و رحت امتحن الElectronics و اكتشفت قد إيه أحلامى عبيطة . الفيلسوف قاعد يفكر سيبوه..... لا تعملوه سلطان و لا تصلبوه..... مش هيوصل لأى حاجة ويموت مجنون من التفكير , يا إمّا ينتحر و يموت عاقل . الدنيا أوده كبيرة للانتظار ....فيها ابن أدم زيه زي الحمار..... الهم واحد .. و الملل مشترك ...... و مفيش حمار بيحاول الانتحار....... عجبي !! جالك أوان ووقفت موقف وجود .....يا تجود بده يا قلبي يا بده تجود .......الاتنين ميهمّونيش فى حاجة ... يلعن أبو ده لأبو ده. أنا كنت شئ و صبحت شئ ثم شئ...... شوف ربنا .. قادرعلي كل شئ....... و كل شىء فى الأصل ولا يسوى شىء . يا مشرط الجراح أمانة عليك...... و انت ف حشايا تبص من حواليـك..... فيه نقطة سودة في قلبي بدأت تبان..... شيل القلب و إوعى تيجى جنب النقطة عشان أفضل بنى آدم . إيديا في جيوبي وقلبي طرب..... سارح في غربة بس مش مغترب .....و حدي لكين ونسان و ماشي كده وبابتعد ما اعرف .. أو باقترب ....أحسن حاجة الواحد يضربها صرمة و يسيب رجليه للطريق . لو فيه سلام في الأرض وطمان و أمن..... لو كان مفيش و لا فقر و لا خوف و جبن.... البنى آدم عمره ما كان هيستريّح ( أول إصدار من الماتريكسArchitect Matrix © version 1.0 ... ). ضريح رخام فيه السعيد اندفن ....و حفره فيها الشريد من غير كفن ....مريت عليهم و تفيت على الاثنين ... انت , عمل لك ايه الضريح اللى بنيته قبل ما تموت ؟ و انت , جتك نيلة .. ما كنتش قادر تبنيلك ضريح رخام انت راخر ؟؟؟ ياللي بتبحث عن إله تعبده...... بحث الغريق عن أي شئ ينجـده .......فكّر بالعقل و انت توصل لربك , ولو ماوصلتش قوم اتوضّا و صلّى ركعتين أضمنلك و أريح لدماغك . حقرا و فوق كوكب حقير محتقـر ......في الكون تكون دنياكو إيه يا بـقر .....و هو الكون يكون ايه أصلا ؟

ازاى عرفنا ربنا

2005-12-24T00:39:00.000+02:00

أقوال واعتقادات خطأ " 5) ربنا عرفوه بالعقل أو ربنا أعرفناه بالعقل هذه هى الأخرى عبارة حبيثة درجت وإنتشرت على ألسنة الخلق فعندما تناقش أحد ويختلف معاك فى قضية يقول لك ( أهدأ . ربنا عرفوه بالعقل ) وذلك لكى يشرح وجهة نظره لك فى أمر من الأمور فيقول هذه العبارة الخبيثة دون تدقيق لما يقول ** وقفة مع العبارة نحن قد عرفنا ربنا بالشرع وبالرسل لا بالعقل سئل عبد الرحمن بن أبى حاتم عن رجل يقول : عرفت الله بالعقل والألهام .فقال : من قال : عرفت الله بالعقل والألهام فهو مبتدع . عرفنا كل شىء بالله وسئل ذو النون المصرى : بماذا عرفت ربك ؟ فقال : عرفت ربى بربى ولولا ربى ما عرفت ربى فالله عزوجل عرفناه بالقرآن وبالرسل الكرام " طيب, ده كلام جميل, السؤال هو ايه اللي خلانا نؤمن بالرسل و نصدق الوحى اللى نزل عليهم من غير عقل؟؟ هل بالمعجزات, هل الشىء الوحيد الى خلانا نتأكد ان أى شخص جه و قال أنا نزل على وحى من السماء أنه يأتي بمعجزه علشان نصدقه؟؟ طب دين الاسلام مفهوش معجزات, أو الأعتماد عليها كان ضيق قوي..وجاء بعد مرور زمن طويل فى الرساله, ومعجزه الاسلام الكبرى هى القرأن, أعتقد مفيش حاجه عايزه عقل علشان تتفهم قد القرأن..وهل كل الناس اللى بتفضل مؤمنه بدياناتها بعد عهد الرسل الخاصين بيهم غلطانين لانهم بيعتمدوا على عقلهم؟ بلاش الديانات, الايمان بالله عموما, هل الاغلبيه العظمى من سكان هذا الكوكب البائس المؤمنين بوجود رب خالق لهذا الكون و مسير لشئونه(بغض النظر عن أسمه, شكله, سلطاته, مكان اقامته, مدى تدخله فى شئون البشر, من هم رسله للارض,...) هل كل الناس دى أمنوا بالله عن طريق الرسل و الوحي؟؟ الواقع بيقول لأ.. كتير قوى منهم وصلولها كده (لامؤاخذه) بالدماغ.. طب الردود الظريفه الذكيه اللى بيستدلوا بيها بتاعت الأخ ذو النون المصري و الأخ عبد الرحمن بن ابى حاتم إن إحنا عرفنا الله بالله, اللى انا فهمته ان الله هدانا علشان ندرك وجوده, بغض النظر ان منطقيا دى مش أجابه عن السؤال, لكن.. طب ليه فى ناس مش مؤمنه بوجود اله؟؟ او مؤمنه بوجود اكتر من اله, او لسه لغاية دلوقتى مش متفقين على صفات الاله ده.. ليه مدام المصدر واحد, وليه ربنا اختار شوية ناس و معرفهمش بوجوده؟؟ محدش يقولى تقصير منهم.. او شر متأصل جواهم.. انا لو كنت طفل ولدت فى غابه في أحراش أفريقيا و موصلتليش اى معلومات عن خالق لهذا الكون من أى حته, فاكيد أنا مش أنسان ِشرير, و محدش يلومني لو عبدت أسلافى اللى أرواحهم بتنورللى السما بالليل. أكيد ربنا عرفناه بالعقل, لو مفيش تدخل خارجي, انا أظن ان الإنسان هيوصل بفطرته لوجود خالق لهذا الكون, وهنتفق على جزء كبير من صفاته بدون الاعتماد على وسائل مساعده بحب جدا قصة حي بن يقظان لإبن طفيل, ياريت تقروها.. هي مقصدها صوفي شويه, لكن بالظبط اللي بنتكلم فيه.. كيف يمكن للعقل البشري أن يصل للايمان باله بدون مساعده خارجيه

Imperical إمبيريقى

2005-12-23T06:46:00.000+02:00

يعنى(مادّى) أو (حسّى) مثل من لم يصدّق أن الماء تحوّل فى كأس المسيح إلى عسل إلا بعد أن رآه و لمسه و تذوقه ..... بالطبع هؤلاء ابناء 60 فى 70..... فأنا لو قال لى المسيح (ص) أنه تكلم فى المهد أو أنه يستطيع الاتيان بمائدة من السماء و عليها ما لذ و طاب بل و أنّه ولد هكذا !!- يعنى بدون أب - لصدّقته بدون تردد .. أو لو أخبرنى سيدنا محمد (ص) أن الله ينزل عليه قرآنا من السماء أو أنه رحل من مكة إلى القدس ثم إلى السماوات السبع ذهابا و عودة و عاد فوجد فراشه لا يزال دافئا لقلت : صدق محمد ...فكون هذا الكلام صادرا عن مصدر موثوق فيه يغنى عن أى إثبات أو برهان حتى ولو لم يسعه عقلى الضيق . إذن فالإمبيريقية تهمة عظيمة و ذنب لا يغتفر .. ولكن أتعرف سيدنا ابراهيم (ص) ؟؟ أظن أنّه كان إمبيريقيا حين قال (رب أرنى كيف تحيي الموتى قال أولم تؤمن قال بلى و لكن ليطمئن قلبى) !!! أكانت لديه شكوك فى أن الله يستطيع أن يحيي الموتى ؟ حاشا و كلا .. أبو الأنبياء ؟ خليل الله ؟ و لكن ماذا فعل الله معه ؟ بمنتهى البساطة أراه الله ما كان يريد أن يرى فاطمئن قلبه و يا دار ما دخلك شر .. إذن فالإمبيريقية ليست تهمة عظيمة وليست ذنبا لا يغتفر ,و أولئك القوم ليسوا ابنا60 فى70 ولا حتى 2x3 و الإمبيريقى ليس غبيا أيضا فهو لا يحتاج أن يرى الله لكى يصدق وجوده , و لا يحتاج أن يقابل الإلكترون شخصيا ليتأكد أنه سالب الشحنة - فمن البعرة تعرف البعير- ولكنه لا يقبل ما لا يدركه عقله دون أن يراه أو يرى دليلا عليه. أكاد أرى العمامة فوق رأسى و أرانى على المنبر يتدفق الذهب من بين شفتى إلى آذانكم , فاليوم هو يوم الشيخ كبريت . ولكن الشيخ كبريت عاد لتوّه من سهرة طويلة و ممتعة مع أصدقائه تطرقوا خلالها لهذا الموضوع ولم يغلقوه و نيااااااههمممم مم سأذهب للنوم الآن لأننى متعـ .....خ خ خ خ

صباحك زي وشك يا مصر..جميل وحزين

2005-12-20T20:46:00.000+02:00

دى بقى ميزه تانيه للإختراع ده, كميه الحاجات اللى بقراها و ببقى عايز أقول للناس عليها و أكسل.. كده الموضوع أسهل شويه.. كان حد بعتلى دى فى مايل من مليون سنه, بس أفتكرتها النهارده و قررت أحطها هنا. انا (قلب) بلال فضل.. صباحك زي وشك يا مصر..جميل وحزين ( بقلم : بلال فضل ) صباح الخير يا مصر .. صباح الخير على الناس المرهقين من عناء الحياة والدايرين في الساقية اللي منصوبة لهم من سبعة الاف سنة .. الناس اللي عايشة اليوم بيومه ..كل أملها يعدي من غير اي خساير .. مابتفكرش في بكره عشان ماتتقهرش... مابتفكرش في النهارده علشان ماتتنقطش.. صباح الخير على ضحكة عالية في قهوة شايها مايتشربش .. على شاب بيقوم لست كبيرة في الاتوبيس.. على كوباية شاي باللبن وحتة بقسماط بعد صلاة الفجر جنب السيدة نفيسة .. على قهوة في الحسين مبيعديش عليها حسن بشندي.. على سينما زحمة والضحك طالع من القلب للركب .. على سور الأزبكية وكتبه المعتقة .. على عشاق فقرا مش لاقيين شقة محافظة فبيخطفوا الفرحة متداريين في صخور الكورنيش ورا شجر النيل .. على صوت الشيخ السيد متولي وهو بيقرا سورة يوسف وبيخلينا نعيط على سيدنا يعقوب اللي ابيضت عيناه من الحزن .. صباح الخير على كل الناس اللي بتشقى عشان تجيب اللقمة من بق الاسد ومراته .. على عربيات الكبده والسجق لحمة الفقير وعربيات الدوم تفاح الفقير وعربيات السوبيا خمرة الفقير.. على طباق الكشري خالي العدس ورد زياده وغرقان في الدقة .. على فطاطري الحسين اللي سمى نفسه بيتزا الحسين فباظ من ساعتها.. على العدوي بتاع ميدان الجيش يعني احلى رصة فول وطعمية بمستلزماتها وبرخص التراب .. على أفران العيش في اسكندرية .. على البلكونات اللي مافيهاش كراكيب ولا بصل ولا توم .. فيها كرسيين وكوبايتين شاي وبصة رضا واهة شوق .. على كل صالة بتلم الناس اللي مش عارفة تتلم على نفسها .. على كل نكته قبيحة تتقال بصوت عالي .. صباح الخير على الطاهرة6 رئيسة الديوان ودراويشها وسجاد جامعها .. على روح سيدنا الحسين اللي مش مدفون هنا اساسا .. صباح الخير على كل سطر كتبه نجيب محفوظ وكل شجرة سقاها علاء الديب وكل فيلم كان هيعمله احمد زكي وكل كرسي ماتضايقش لما صلاح جاهين قعد عليه .. صباح الخير على الناس اللي واقفة في طابور حكومة رخم بتتخانق عشان تسلي بعضها .. على مدرجات الدرجه التالتة وناسها اللي مش هنا اساسا .. على الاهلي لما يسكع الزمالك ستة وساعات اربعة وساعات اتنين .. صباح الخير على كل ايدين بتسلم عليك باهتمام بعد الصلاة.. وعلى كل امام ما بيطولش في الوقوف ويطول في السجود .. صباح الخير على سينمات الدرجه التالتة والفاكهة اللي مش مرشوشة مبيدات وسعاد حسني وهي بتغني انا ضاع مني حاجه كبيرة اكبر من اني اجيب لها سيرة .. صباح الخير بالليل على فرشات جرايد الطبعة الاولى وحفلات الميدنايت والقهاوي المناوبة..... على العيال وهي بتهز اكياس الكشري الصبح وهي رايحة المدرسة .... على بتوع الزلابية اللي واقفين قدام المدارس خايفين من البلدية ... صباح الخير على اكشاك السمك في ابو قير والترام الاصفر وسيدي البوصيري وبردته والمراجيح اللي ورا ضريحه .. وعم نفنف بتاع الكبدة في المنشية وطعمية ابو احمد الاكتع في شارع عمر بن الخطاب .. صباح الخير على وقفة النواصي والقمم والخناقات " البوق " اللي الناس بتفش فيها غلها وبتوفر مادة فرجه للواقفات في البلكونات ... صباح الخير على كل جميلة تغري باثم النظرة الثانية والتاسعة .. صباح الخير على الناس اللي بتكوي قمصانها وتبص على المراية قبل ماتنزل .. على شوارع الزمالك وجاردن سيتي والمعادي اللي تشرف وتفتح النفس للحياة وعلى كل اللي بيمشوا فيها وبيفرحوا للي ساكنين فيها .... صباح الخير على حب الجامعة ومظاهرات الجامعة وكل افيه اتقال على اي معيد غتت في اي سكشن ... صباح الخير على الاوض اللي فوق السطوح والشقق المفروشة والايجار اللي مابيتكسرش .. على صينية الاكل اللي بتيجي لك من الجيران قبل ما يتفقوا معاك تدي ابنهم درس... على قران الفجر وصوت النقشبندي وهو بيقول مولاي اني ببابك قد بسطت يدي ... صباح الخير على الجمعيات اللي ساتره الشعب المصري .. على تمييلة الصاحب على صاحبه في ساعة الزنقة .. صباح الخير على الخير على ام حمدي عبد الرحيم اللي بتحب جمال عبد الناصر وام ايمن عبد الهادي اللي بتعمل رز مسكر وملوخية تضيع مستقبلك , وام على رجب اللي ماشفتش البحر الا في عربية الاسعاف اللي خدتها على المستشفى ...صباح الخير على كل نجع وكفر مايكفرش من العيشة .. صباح الخير على الكنايس اللي شكلها حلو ,, على الاتوبيس النهري لما يكون نضيف.. على عم فاروق ونصبة الشاي بتاعة كوبري عباس .. على كل زوجه مابتنكدش على جوزها , وكل راجل مابيستقواش على ولية وعلى كل ندهة لبابا وكل لعبة لبنوته ومسدس ميه لحماده ... صباح الخير على كراتين الجهاز المتعانة فوق الدواليب .. واحلام الجواز المتحاشة تحت البطاطين.. صباح الخير على عامود السواري والفاتحة اللي بقراها وانا ببص من تحته على تربة ستي اللي قالتلي وانا رايح الجامعة اول مرة " يابني البلد بلدهم يعملوا فيها ما بدالهم !" صباح الخير على لمة صحابي في القهوة وشتايمهم فيها علشان بطلت اجي .. صباح الخير على دعوة ربنا يكفيك شر طريقك .. صباح الخير على عبد الناصر قبل مايبقى فرعون وعلى الشعراوي وهو بيقول اذا كنت قدرنا فليعنا الله عليك , وعلى عبد الحليم وهو بيعيد كوبليه حبيبي والله لسه حبيبي والله , وعلى أم كلثوم وهي بتقول تهون عليا الروح لو فارقت جنبي , وعلى محمد فوزي وهو بيقول اي حاجه يعوزها .. صباح الخير على مرجلة ابراهيم عيسى الذي اخرجني من الظلمات الى النور.. على مسلسل ارابيسك وفيلم حب في الزنزانة وفينالة الكيت كات ونجيب الريحاني وهو بيغني حتى الفيران اشتكت من قلة فرافيتي ... على عم حجازي اللي سابهالنا مخضرة وراح طنطا .. على محمود عوض اللي قاعد في البيت .... على بهاء طاهر اللي بيصلب طوله علشان يروح المظاهرة ... على فاروق عبد القادر وصحبته .. على حمدي عبد الرحيم واكرم القصاص وقهوة المنظر الجميل والايام اللي كنا مش لاقيين ناكل فيها بس كان عندنا شاي وسكر كتير.. صباح الخير على مراتي بنت الاصول اللي مابتخافش من اي حاجه بكتبها ..صباح الخير على بنتي اللي لو ماشفتهاش بتكبر .. قولولها ان ابوكي كان راجل جدع

الحريف

2005-12-14T04:03:00.000+02:00

وااوو, حد شاف الفيلم ده قبل كده؟؟ جامد فحت.. أنا سمعت إسمه زمان لكن دى أول مرة أشوفه تمثيل عادل إمام فظيع, مش الأحسن لكن واحد من أحسن أدواره.. فردوس عبد الحميد وهميه.. لكن المشكله فى الكتابه و الإخراج, يخرب بيت محمد خان.. انا عايز الحشرات اللى معجبهمش اننا دخلنا بنات وسط البلد يشوفوا الفيلم ده علشان يعرفوا يعنى ايه محمد خان الفيلم من انتاج 1984, شويه شبه المشبوه و المتشول.. الافلام اللى جيل عادل إمام بيخرج فيها من صدمة انكسار حلم الستينات لمواجهة واقع الانفتاح الكاسر.. الأفوكاتو و الغول.. ممكن أسميهم افلام ماقبل اللعب مع الكبار, بحبهم جدا الأفلام دى, خصوصا المفضل عندى:المشبوه كأنك تقريبا بتتفرج على فيلم قديم لدينيرو أو باتشينو..تمثيل, واقعيه, عمق فى الشخصيات لو يحكمونى فى الجزم اللى بيقولوا على دنيا انه بيسىء لسمعة مصر علشان مطلع شوارع وسخه و ناس فقيره.. أخخخ الفيلم مليان ناس ببنطلونات بيجامه, و عيال معفنه, وناس بكروش قاعده على القهوة, و مفيش شارع مكنوس فى الفيلم.. هوه ده اللى عايز أشوفه لما أتفرج على فيلم عربى.. المهم فيلم جامد كيك, اللى مشافهوش يشوفو

طب ليه

2005-12-13T02:32:00.000+02:00

مم, مش عارف أقول ايه الحقيقه, كنت قاعد بقرا الاخبار فى الجزيره, و إتصدمت بالخبر ده.. تواصل الاعتداءات ضد العرب في أستراليا اوكى, مش هقول انى اتصدمت, أو انها حاجه جديده.. بس يمكن اتفاجئت شويه, او مكنتش متوقع, ويمكن علشان استراليا كانت من الحتت اللى الواحد كان عايز يعيش فيها.. مش عارف, المهم انى اتضايقت و قررت(أخيرا) أكتب, ليه الانسان ممكن يكون عنصري؟؟ لسه كنا خارجين من شويه, والموضوع اتفتح و فكرت فيه.. هل الانسان فعلا بيخاف أو بيكره المختلفين عنه, ولا بس فئات معينه من البشر بُينحاز ضدها, و هل العنصريه محكومه بفترة زمنية معينة, ولا حاجة مطلقة.. يعنى زمان الناس كانت بتضتهد الغجر, اليهود, الزنوج, مثلا دول كانوا حاجات عالمية مش اقليميه, زى الأرمن مثلا فى مناطق معينه, او الاكراد.. لكن الموجات دى انحسرت شويه.. هاقول عالميا برضه.. ليه بقى, ازاى الناس دى خرجت من دائرة الاضتهاد؟؟ اليهود مثلا قدروا يستغلوا الإعلام أحسن أستغلال انهم يغيرول صورتهم عند العالم, ده غير تأثيرهم سياسيا فى الغرب, لكن انا بتكلم أكتر عن الصوره عند الأفراد.. الوضع مختلف بالنسبه للزنوج مثلا.. هما قدروا يحاربوا بوسائل نقدر نقول انها "ديموقراطية" أكثر لغاية مقدروا ياخدوا جزء كبير من حقوقهم.. أنا عارف ان الموضوع فيه متغيرات اكتر من كده بكتير, والموضوع أعمق بمراحل, لكن انا الحقيقه قاعد بتعذب فى الكتابة, معنديش معلومات كتير عن الموضوع فعايز بحث.. اكن انا كنت عايز أسأل, وبعدين, هل إحنا كعرب, وبعدين مسلمين هنفضل كده كتير, والمفروض نعمل أيه؟؟ و إحنا كأفراد نساهم إزاى فى حل الموضوع؟؟ هابقى أكمل بعدين